紫苏炒山坑螺

  喺广州最美嘅水源地流溪河畔,美食飘香,令唔少街坊食指大动。前两日,城中媒体就专门做咗个流溪河美食嘅专题,不过佢漏咗一样好重要嘅美食,就系山坑螺。

  一直觉得,去从化如果唔食山坑螺,就等于白去。不过,要食到真系靓嘅,亦唔容易,有时候喺流溪河边嘅农家乐餐厅,亦能遇到好嘅山坑螺。山坑螺比一般嘅田螺细啲,而且身长色深,颜色墨绿,就同小溪流中嘅石头咁,睇上去就有一种天然嘅味道。用紫苏炒,添加些少辣椒,山坑螺唔可以炒得太干,留啲紫苏、辣椒汁喺螺壳上,更加和味。摆上台后,墨绿同深红、紫色相间,一碟香气浓郁,真系色香味俱全。一啖啜落,肥嫩嘅螺肉,满嘴浓郁清甜嘅香,爽而不腻,唔会有其它田螺嘅泥味。啜螺系会上瘾嘅,更何况美味嘅山坑螺,更加让人停唔到口。

  记得细个阵时,我嘅乡下亦有山坑螺。就喺村边嘅小河度,石头罅里边,就可以摸到,尤其系夜晚,啲螺会出来活动,有时一摸就几只。不过,随住环境变化,宜家乡下嘅小河小溪度,已经少咗好多。而从化流溪河以及周边嘅山村,仲能睇到清澈嘅溪流,食到甜美嘅山坑螺,亦系从化乃至广州人嘅福气。只有保护好溪流河嘅环境,山坑螺先会继续存在,呢味珍贵嘅美食,先会保留落去。

内容版权声明:除非注明,否则皆为本站原创文章。

转载注明出处:http://cer-contact.com/huotanmu/865.html